‘U Natali ‘i ‘na vota

‘U Natali ‘i ‘na vota era ‘n’atra festa

‘ncuminciava cu ‘n prufumu ‘nta testa

‘u jornu ‘i ll’Immaculata

c’a vera prima crispeddhata

ricotta, ‘lici, zucchuru o meli

inchiva ddhi fritteddhi minati a duveri

‘U Natali ‘i ‘na vota era ‘n’atra cosa

si circava pu presepi ‘a giusta posa

si cugghjvunu giurnali e petruliddhi

mi si fannu munti, ssrati e nascundigghji

mentri ‘a casa s’inchiva ‘i nuciddhi

mmenduli, nuci e ffica sicchi.

“’I Santa Lucia a Natali

crisci ‘u jornu un passu ‘i cani”

e ppi’ ffari cchjù duci ‘u Natali

si ‘nfurnavunu ggià tanti petrali

si faciva ‘ u turruni, chiddhu duru pi’ renti

e ‘u gilatu cu zzuccuru fundenti.

A jucari ‘ncuminciavunu i picciriddhi

a ‘mbidda, c’a rrumbula e a nuciddhi.

e quandu era tempu ‘i nuvena

ggiùvini e vecchji cu bbona lena

ravanti ‘a rutta vota aniti si priava

‘Tu scendi dalle stelle’ si cantava …

A vigilia,’ u bbaccalà ammoddu si mintiva

‘u caulusciuri c’u piscistoccu p’a gghiotta si cunzava

mentri ‘a ‘nghiddha casa casa sa fuiva

e ppoi puru tagghiata ‘nta pignata si muviva

pirchì ‘u cenuni ‘na vota era ri magru

e a Natali essiri sulu er’assai raru:

a famigghja si ‘llargava p’a via

si grariva ‘na bbona o tinta cumpagnia.

Spittandu menza notti poi ‘na tumbulata

chi scorci ‘i purtuallu si jucava

pi’ masculi randi ch’i carti ‘na stuppata

poi tutti a missa, a chiusura ‘ra serata.

E m’u sapiti: “’I Natali in poi

crisci ‘u jornu un passu ‘i bboi’”

 Rosalba Barcella

–  fonte www.rosalbabarcella.net

Recommended For You

About the Author: Redazione ilMetropolitano